Piero Marras

(Nùgoro, 1949)

P

iero Marras (Piero Salis a s’anàgrafe) nàschet in Nùgoro in si 1949. Est amentadu comente antitzipadore e esponente mannu de sa mùsica ètnica sarda. Comintzat a sonare in Nùgoro cun trumas de su logu e sighit, cun àteras trumas, in Casteddu dae su 1967. Est su 1978 s’annu de su batìjamu discogràficu sou cun su discu  Fuori campo, imprentadu dae EMI. Cun sa matessi domo discogràfica essit, in su 1980, Stazzi uniti, chi intrat luego in sa classìfica tenende sorte manna. Pustis incarrelat unu tretu de produssione manna in limba sarda, prena de riferimentos a pessonazos, sonos, ritmos e atmosferas de sa cultura isulana, totu acolostiadu in modu fitianu intro de una bisura cantautorale. Marras etotu si bidet “che a sirbone chi fragat sas raighinas de su connotu e de s’istòria de una terra imbreaga de mare e de birde”. In su 1985, cun Abbardente, chi est unu de sos primos esempros de “world music mediterrànea”, comintzat una caminera chi sighit, duos annos apustis, cun Funtanafrisca pro lòmpere in su 1988, a su primu discu live sou, Piero Marras in concerto. Su discu chi sighit est Tumbu, prenu de istrinas e de faeddos susu de sas chistiones chi tenet prus a coro Marras: sa paghe e s’amore, sa gherra e s’ascru. In su 1997 torrat a imprentare Fuori campo, su primu discu sou, e s’annu chi sighit sonat in Cuba pro sa rassìnnia Ichnos. Sun annos chi iscriet fintzas pro àteros cantantes (Andrea Bocelli) e at s’azudu internassionale (Dionne Warwick). In su 2001 essit su de oto discos, In su cuile ‘e s’anima e, fatu de duos annos de prèmios e riconnoschimentos de importu, sa regorta de cantones in limba sarda B’est. In su matessi annu, su 2003, in Sulmona, retzit su “Premio Internazionale Ignazio Silone” pro “su balore culturale mannu de sas cantones suas in limba sarda”. L’ultimo capro indiano est de su 2004, unu discu chi regollit totu sas cantones prus famadas dae su 1978 a su 1982. Dae su 2005 finas a su 2018 at imprentadu àteros 5 discos: Pieromarras Live 1 e 2, Ali di stracci, Storie liberate, Istorias.