Oreste Pili

(Cabuderra, 1953 – 2018)

O

resti Pili est nàschidu in Cabuderra in su 1953. At istudiadu in su Liceo clàssicu, lende daboi sa  Làurea in Limbas istranzas in s’Universidade de Casteddu ispetzialisènde-si in limba tedesca. Daboi s’est ispetzializadu in Limbìstica sarda fatende su maistarzu universitàriu de gradu II in Acostamentos interdisciplinàrios a sa didàtica de su Sardu. At àpidu sèmpere un’istima manna pro sa limba sarda. Est istadu professore de Tedescu e de Sardu. Lu podimus cunsiderare umpare a Doddore Meloni e a Bainzu Piliu comente unu de sos babbos de su movimentu limbìsticu sardu e de sos prus sighidores de importu de su neo-sardista Simon Mossa. A isse puru l’an postu in presone dae su 1981 a su 1982 pro chistiones polìticas cando in Sardìnnia bi fit su proibitzionismu limbìsticu e a faeddare de Sardu cheriat nàrrere èssere cunsiderados “tramadores”. Oresti Pili fit unu connoschidore mannu de sa Limba sarda e fintzas de sas lezes de amparu de su Sardu. Aiat leadu parte a su Partidu Sardu e daboi fit intradu intro de sos fundadores de su MNS (Movimentu Natzionalista Sardu) e de sos RossoMori. Fit istàdu puru s’assessore a sa Limba sarda in su Comune de Cabuderra, fatende abèrrere pro sa prima borta s’Isportellitu de sa Limba sarda de su Comune matessi (cunfroma a sa leze de s’Istadu nr.482/1999) ativende puru sos cursos de formassione in sardu pro sos dipendentes de su Comune. At traballiadu puru in s’Isportellu de sa Limba sarda de sa Provìntzia de Casteddu puru in sa prima annualidade. In su 2006 fundesit su «Comitadu iscientìficu pro sa Norma campidanesa de su Sardu Standard». In su 2009 nd’at fundadu, umpare a àteros baranta cumpanzos, s’assòtziu culturale «Acadèmia de su Sardu». At iscritu: Dotrinas de Cabuderra; Is fradis. In calidade de co-autore: Arrègulas po ortografia, fonètica, morfologia e fueddàriu de sa Norma Campidanesa de sa Lìngua Sarda (chi est sa norma ufissiale de sa Tzitade Metropolitana de Casteddu e de su Comune de Cabuderra); DFC – Fueddàriu cabuderresu; Su Sardu – proposta de ortografia; Su Sardu Standard. Oresti est mortu in Cabuderra su 23 de frearzu de su 2018.