COMUNICADU DE SU SÒTZIU CULTURALE ACADÈMIA DE SU SARDU APS SUBRA S’IMPITU DE SU SARDU IN S’AMINISTRASSIONE PÙBLICA E IN SAS ISCOLAS DE DONZI ÒRDINE E GRADU

Comunicadu nr 01/2023

Cun su comunicadu afatante su sòtziu culturale Acadèmia de su Sardu APS INFORMAT totu sos aministradores de sos entes locales e medianeris (sìndigos e assessores a sa cultura) e sos dirigentes de sas iscolas, impinniados in s’amparu e in su balorimentu de sa limba sarda, chi, in sos portalitos limbìsticos e in sos cursos de formassione, est NETZESSÀRIU impreare su Sardu in sas macrobariedades istòrico-literàrias suas. S’amentat, difatis, chi sa ratio de sa norma càbida in sa leze 482/99 de s’Istadu Italianu est diritzada a tutelare sas minorias limbìsticas istòricas e duncas su campidanesu e su logudoresu, pro su chi pertocat su Sardu, cun custu intendende bogare afora calesisiat tribàlliu limbìsticu imbeniente, afatante puru, puntadu a su lompimentu de cumproas limbìsticas de utilidade dudosa.

Daghì su sardu campidanesu reguladu, càbidu in su lìberu «Arrègulas po ortografia, fonètica, morfologia e fueddàriu de sa norma campidanesa de sa lìngua sarda» est istadu seberadu cun ufissilidade siat dae sa zai Provìntzia de Casteddu (cun delìbera de su CP nr. 17 de su 17.03.2010 e como Tzitade Metropolitana de Casteddu) e dae su Comune de Cabuderra (cun delìbera nr 28 del CC del 20.06.2013), 

Acadèmia de su Sardu APS nde CONSIZAT S’IMPREU e s’ ADOSSIONE a totu sas aministrassiones comunales, subracomunales e intra de mesu e in sas iscolas chi torran in sas areas inue est faeddada sa macrobariedade istòrica sardu-campidanesa.

Duncas Acadèmia de su Sardu APS PEDIT, fatènde-si portaboghe de sos sòtzios suos e de totu sos chi an importu, chi faghen parte de sa comunidade nostra, su rispetu rigorosu de sas normas chi sun in bigore, in matèria de tutoria e de baloridura de sa limba sarda.

“Una limba, modu de èssere de sos logos, de sas comunidades e de sas persones. Una limba bia, capassa de si reconnòschere in sos andonzos a boghe de sa vida de donzi die. Prus e prus una limba chi, in s’impreu sou, potat ispijare sas bariedades de sas faeddadas suas peri sas macrobariedades suas de su connotu”.

Pauli (CA), 11.05.2023

Su sòtziu culturale
Acadèmia de su su Sardu APS