Comunicadu nr 02/2024
Cun custu comunicadu su sòtziu culturale «Acadèmia de su Sardu APS», dae annos impinniadu in sa defensa, avaloramentu e afortigamentu de s’impreu de sa limba sarda faeddada e iscrita, INTERBENIT subra sa chistione de comente cròmpere impresse a unu bilinguismu cumpridu e a s’introdusidura de sa co-ufissialidade de su Sardu.
«Acadèmia de su Sardu APS» est de su pàrrere chi s’Istadu italianu e sa Regione Autonoma de Sardìnnia apan su dovere de fàghere a manera de pònnere in efetu sa Carta italiana e s’Istatudu de autonomia ispetziale de Sardìnnia pro chi si potat cròmpere a unu bilinguismu cumpridu, pro chi su Sardu potat tènnere sa matessi dinnidade e ufissialidade de sa limba italiana in sa sotziedade, gai comente in sas istitussiones, in s’aministrassione pùbrica e in sa toponomàstica puru.
«Acadèmia de su Sardu APS» cun referimentu a sa limba sarda e duncas a totu sa comunidade sardòfona de Sardìnnia, chi at assumancu 1 millione e 250miza persones, est de su pàrrere chi su livellu de amparu e afortigamentu de custa limba depat èssere artziadu luego a su matessi livellu de sas àteras minorias regionales comente a esempru cuddas germanòfonas, francòfonas e islavas chi bi sun istoricamente aintro de sas làcanas de sa Repùbrica matessi. Isperamus duncas chi si potat cròmpere a aplicare, a manera cumprida, s’art. nr 6 de sa Carta italiana. In d-una repùbrica chi narat de èssere democràtica non bi poden èssere discriminassiones, non bi poden èssere minorias de livellu A e minorias de livellu B, sos deretos sun che pare pro totus.
Est pro custa rejone chi pedimus a boghe manna a sos consizeris regionales de calisisat partidu, movimentu e ideologia de fàghere a manera de introduire LUEGO sa co-ufissialidade de sa limba sarda in s’istatudu de autonomia pro chi sa sotziedade sarda bessat bìlingua deaberu e pro chi su sardu potat èssere introduidu a pretzisu comente matèria de imparu curriculare in donzi iscola de donzi òrdine e livellu de s’ìsula e in s’universidade; sa matessi cosa pro su chi pertocat s’aministrassione pùbrica e sas istitussiones sardas. Non faghet prus a andare innantis a progetos e progeteddos. Semus timende chi sa limba sarda s’isperdat in d-unos cantos annos in su benidore e pro custa rejone non podimus e non cherimus prus aisetare. A sa sotziedade sarda l’at istracada custa mancàntzia de respetu pro sos deretos de sos sardòfonos.
Pro agabbare, duncas, in custu comunicadu pedimus a totos sos consizeris regionales sardos, de calisisiat partidu e ideologia polìtica, de cròmpere a unu resurtadu istòricu mannu aintro de custa lezisladura matessi, ponzende agabbu pro sèmpere a un’istentu chi non faghet prus a apoderare.
MONSERRATO (CA), 14.12.2024
L’associazione culturale
Acadèmia de su Sardu APS
