Su Sardu, fintzas dae su Mesuevu, si est averadu in duas faeddadas mannas o macrobariedades (o castas). Una de-i custas faeddadas mannas est su Sardu logudoresu/nugoresu (dae como innantis inditadu comente Sardu logudoresu ebia) chi est faeddadu in sa Sardìnnia de mesu (Barbàgia), in bona parte de su Cabu de Susu de s’Ìsula (Logudoro-Meilogu e Marghine-Costera) e sas chi sun giamadas ìsulas linguìsticas de Luras e Terranoa. Su Sardu logudoresu est faeddadu dae gasi 400miza persones, est sa bariedade prus arcàica de sa limba sarda. Ma pro contras est difarente dae bidda in bidda. A manu de intro de su Sardu logodoresu podimus bìdere unas suta-bariedades: sa faeddada de su fiotu barbaricinu de Fonne-Ollolai; su Sardu logudoresu de bàsciu; su Sardu logudoresu de mesu; su Sardu logudoresu de susu e de ponente. Pro finis sa parte prus manna de sa populatzione de Luras e de Terranoa (ìsulas linguìsticas sardofonas in Gaddura) faeddan ancora fintzas su Sardu logudoresu.
