Eduardo Blasco Ferrer

(Bartzellona, 1956 – Bastia, 2017)

E

duardo Blasco Ferrer, linguista cadalanu, est nàschidu in Bartzellona in Cadalùnnia su 15 de su mese-de-làmpadas de su 1956 e est mortu in Bastia de Còssiga su 12 de ghennarzu de su 2017. Pustis de àere lassadu sa Cadalùnnia pro lòmpere a triballiare e istudiare in Germania cale istudiante-triballiadore, at comintzadu a istudiare filologia romanza e linguìstica romanza cando s’est assentadu e at leadu parte a su Cursu de làurea de Linguìstica romanza in s’Universidade de Erlangen in su 1976 e sèmpere in custa universidade s’est laureadu in su 1981 in Linguìstica romanza, lompende fintzas a fàghere unu Dotoradu de chirca in Linguìstica romanza cun Heinrich Kuen in su 1982. Pustis de àere leadu sa làurea e su dotoradu de chirca in Germània est bènnidu in Sardìnnia inue at fatu su lezidore de Lìngua cadalana in s’Universidade de Casteddu. A comintzu de su 1993, in s’Universidade de Casteddu at otentu s’incàrrigu de professore de Lìngua italiana e posca, dae su 1996, s’incàrrigu de professore de Linguìstica sarda in sa Facultade de Iscièntzias de sa Formassione. Aiat custos duos incàrrigos finas a cando est mortu. Dae su 2001 finas a su 2008 fit fintzas su dirigidore de su Master universitàriu de livellu II in Acostamentus interdisciplinàrius a sa didàtica de su sardu. At mandadu adenanti su tretu teòricu zai comintzadu dae M.L. Wagner. Cojuadu in Sardìnnia cun d-una fèmina sarda, at tentu duas fizas. At àpidu àteros incàrrigos fintzas pro fàghere su professore de Linguìstica romanza, Filologia romanza e Glotologia in sas Universidades de Tàtari (in su 1986), Bonn (in su 1987-88), Frorèntzia (1988) e Mònacu de Baviera (dae su 1989 a su 1991). Est famadu meda in campu linguìsticu pro sas chircas iscientìficas susu de sa limba sarda e sa didàtica de su sardu, ma fintzas pro su chi pertocat su cadalanu, s’ispanniolu, su ladinu e s’italianu. In sos ùrtimos annos at leadu parte a sa dibata susu de su Standard de sa Limba sarda leande a coro s’idea de unu standard de su sardu a duas  normas. Comente ativista-defendidore de sos deretos  de sos sardòfonos at fatu parte fintzas a su movimentu pro sa Limba sarda e su bilinguismu in Sardìnnia. Su 2 de ghennarzu de su 2009 paris cun àteros baranta sòtzios e sòtzias fundadores at tentu in pee s’assòtziu culturale Acadèmia de su Sardu.

In prus at fatu parte de: Istituto per l’Alto Adige; Società di Linguistica Italiana; Società Italiana di Glottologia; Centro di Studi Filologici e Linguistici Siciliani; Associazione di Storici della Lingua Italiana; Verband der deutschen Italianisten; Deutsch-Katalanische Gesellschaft; Sociedad de Lingüística Española; Associaciò Internacional de Llengua i Literatura Catalanes; Association Internatzionale d’Etudes Occitanes. 

A sighire fit fintzas: cordinadore de sa Setzione Linguìstica istòrica in su Cungressu internassionale de Linguìstica romanza de Santu Jacu de Compostela paris a Yakov Malkiel e Heinz Wolf; dirigidore de sa collana Istùdios de Linguìstica sarda, paris a Heinz Jürgen Wolf; codirigidore de su Tzentru Wagner pro sa Chirca istòrica-linguìstica susu de su sardu (Nùgoro); dirigidore responsàbile de sa collana “Samanunga” cun Peter Koch, John A. Smith e Shiegeaki Sugeta; sòtziu (1999-2004) de Advisory Board de Romance Philology (Berkeley).

Sas òberas prus de importu de Blasco Ferrer:

Grammatica storica del catalano e dei suoi dialetti con speciale riguardo all’algherese, Tübingen, G. Narr, c1984; La lingua sarda contemporanea: grammatica del logudorese e del campidanese: norma e varietá dell’uso: sintesi storica, Cagliari, Della Torre, c1986; Storia linguistica della Sardegna, Tübingen,  Niemeyer, 1984; Le parlate dell’alta Ogliastra: analisi dialettologica: saggio di storia linguistica e culturale, Cagliari,  Della Torre, 1988; Ello, ellus: grammatica sarda, Nuoro, Poliedro, c1994; La lingua nel tempo: variazione e cambiamento in latino, italiano e sardo, Cagliari, CUEC, 1995; Breve corso di linguistica italiana: con facsimili, edizione e commento d’un testo quattrocentesco ad uso di seminari ed esercitazioni, Cagliari, CUEC, 1996; Pro domo: grammatica essenziale della lingua sarda, Cagliari, Condaghes, 1998; Italiano e tedesco: un confronto linguistico, Torino, Paravia scriptorium, c1999; Italiano, sardo e lingue moderne a scuola, Milano, F. Angeli, 2003; Crestomazia sarda dei primi secoli, Ilisso. 2003; Tecniche di Apprendimento e di Insegnamento del sardo, Della Torre, 2005; Storia della lingua sarda, Cagliari, CUEC, 2009; Sardo e italiano a confronto, CUEC (scritu impari a Giorgia Ingrassia) 2007; Glossario di Linguistica sarda, CUEC (scritu impari a Giorgia Ingrassia) 2008; Storia della lingua sarda, CUEC (scritu impari a Giorgia Ingrassia) 2009; Paleosardo. Le radici linguistiche della Sardegna neolitica, Berlin, De Gruyter, 2010; Corso di linguistica sarda e romanza, Franco Cesati Editore, 2016; Manuale di linguistica sarda, (scritu impari a Peter Koch, Daniela Marzo et al.), Berlin, De Gruyter, 2017.