Angius’ House Luigi Bullitta

(Casteddu, 1988)

A

ngius’ house naschet comente unu jogu in su mese-de-Santu Aini de su 2019 cun d-unu vìdeo cun paritzos pessonazos chena nòmines. In pagu tempus Luisi Bullitta, s’imbentore de custos pessonazos, at tentu apretziamentos meda e at pensadu de nd’abèrrere una pàzine in Instagram.
In custa manera naschet sa famìllia Angius, cun ajaja Gisella, sa fiza Marisa, cojuada cun Pissente, sos fizos issoro Michael e Veronica. In sa vida de sa famìllia est sèmpere presente Patty puru, bighina de domo e amiga corale de Marisa.
Sa stòria s’isbòligat  tota in sa bidda de Uda e zai sèmpere faeddende in Sardu campidanesu.
Abellu abellu sa famìllia s’est imannida atzuntzende amigos, connoschentes, bighinos de domo e àteros pessonazos chi forrojan, punghen e faghen mòvere s’istòria: pro nde nàrrere una, Vitàlia, connada de Gisella, trazadora, ponet sas tìrrias. Un’àteru pessonazu chi cumparrit a fitianu umpare cun issa est Immacolata Toeschi, cun sa fràsia sua famada “Che eri facendo, ciccia?”; una fèmina rebeca, de carena russa e una boghe russa chi betat a terra chie faeddat cun issa.
Cun su rìsidu, Angius’ house chircat de leare fintzas chistiones de donzi die comente su bullismu,  paristòrias pazeras sentimentosas, su disamparu, sas matanas de sos piseddos e àteras chistiones chi pertocan sa sotziedade.
Totu sos vìdeos sun fatos impreende s’app Snapchat, chi permitit a Luisi de si furriare in totu sos pessonazos donende a donziunu una cara sua naturale chi los faghen in totu diversos sos unos dae sos àteros.
Su càncaru de sa “sit-com” est sa limba sarda, chi Luisi at imparadu gràssias a sa ajaja sua. In su tempus benidore, Luisi at a sighire a contare sas istòrias de sa famìllia Angius, isperende una die de pòdere imprentare unu lìberu.