Claudia Aru

(Biddaxidru, 1981)

C

laudia nos contat su mundu inue est “nàscïa e pascïa”, e chi duncas connoschet, cun isprudrèddiu e ironia. Cando cantat at sèmpere unu trazu teatrale e unu colore chi a bias amentat su tempus passadu, ma sèmpere cun modernidade e medas bortas cun reminu sotziale. Issa cantat in ingresu, italianu e pruscheàteru in sardu. Cun Arrogalla (Frantziscu Medda) fundat sa truma Bentesoi, chi sonat musica eletro-folk cun sonoridades dub. Tribàlliat paris a sa Razza, Benito Urgu, Randagiu Sardu, Elena Ledda, Rossella Faa, Orlando Mascia, Marino de Rosas… In su 2012 naschet Aici unu discu sìngulu e Burdu Bu cun s’azudu de Joe Perrino. Pustis produet  A Giru a giru, Sa prus Bella, Pocos Locos y Mal Unidos, Vergogna-Bregùngia. In su 2015 sighit unu cursu de cantu jazz e gai cantat, iscriet e produet Momoti, e ponet paris funky, rock progressivu e blues alternativu e ritmu samba, balcan e swing. In su 2015 binchet cun sa cantone Fogu su prèmiu pro sa menzus interpretassione a su Prèmiu Andrea Parodi. Presentat (paris cun àteros artistas) su Suns Sardigna e acoa su Suns Europe. In Radio Rai in su 2021 ghiat cun Elio Turno Arthemalle e Vito Biolchini su programa in sardu Vamos alla plaja e, in su 2022, sèmpere in Radio Rai, ghiat custa bia a sola, su programa A giru a giru, finas custu totu in sardu, inue contat sas isperièntzias suas fatas viagiande e portat sos ispetadores in ziru peri su mundu. Sèmpere in su 2022 la mutin dae Otieri pro presentare in sardu sa de 62 edissiones de su Premio Ozieri di Letteratura sarda, cosa chi nos amustrat un’àtera bia chi su Prèmiu tenet sèmpere un’ogru abizu pro su benidore.