Duo Puggioni

Giovanni Puggioni (Berchidda, 1942)
Anna Maria Puggioni (Berchidda, 1946)

Z

uanne e Anna Maria Puggioni sun duos frades berchiddesos chi an eredadu dae sa mama issoro s’impèllida e su talentu pro su “Cantu a ghiterra”. Anna Maria, mastra elementare cantat e Zuanne, infermiere, sonat sa ghiterra.
Comintzan sa carriera in sos annos ’70 cantende in Tèmpiu. Sighende a cantare in carchi ràdiu locale sos frades comintzan a si fàgher connòschere de prus, fintzas a su mese de martzu 1982 cando, cumbidados a cantare in d-unu cuntzertu de mùsica sarda a su tzìnema Ariston de Aristanis (inue bi fin cantadores famados comente Toninu Canu, Giusepi Chelo, Màriu Firinaiu, su ghiterrista Aldu Cabizza e su sonetista Pepinu Pippia), in mes’ora de cantada resessin a fàghere amatanare su pùbricu.
Dae sa die su “Duo Puggioni” bessit famadu in totu sa Sardìnnia. Cantat in televisione e in giru pro totu s’ìsula.
Sos ispetàculos issoro sun sèmpere prenos de zente e pruschetotu de zòvanos. Bessin a fitianu in televisione e custu los azudat a afortigare s’apretziamentu de sa loba de cantantes dae parte de su pùbricu.
Sa discografìa issoro est longa meda: de “Sardegna tra favola e realtà” de su 1981 finas a “Maria Reina” chi faghet parte de sa gioba de CD “Dami sa manu” pubricadu dae s’Unione Sarda in su 2021.
Sa boghe de Anna Maria est una boghe frima, segura e bene manizada cun d-unu tràgiu ermosu e caraterìsticu de sa Sardìnnia. Zuanne est unu ghiterrista abistu e ispertu, amantiosu de sa mùsica sarda e de melodias antigas o particulares.
Unu contu longu 25 annos, truncadu de una maladia rara, chi at furadu una de sas boghes prus bellas de sa stòria de su cantu sardu, cussa de Anna Maria.