Michelangelo Pira (Mialinu)

(Aristanis, 1939 – Cuartu, 1980 )

M

ialinu Pira (connotu cun su paralùmene de ‘Mialinu de crapinu’) fut s’antropòlogu sardu chi at ischidu pro menzus dare contu e istudiare sa chistione linguìstica sarda in campu antropològicu. Pruscheàteru at istudiadu sas chistiones chi pertocan sa sotziulinguìstica e duncas su problema chi nd’est bessidu a pizu dae sa minimada de sa trasmitidura de sa limba sarda dae mama e babbu a sos fizos, est a nàrrere sa reduida fitiana de su nùmeru de sos pitzinnos chi aian su sardu comente limba de brassolu (o limba de late). At cumpridu custas chircas in d-unu tempus inue sa mudadura antropològica fut prus crara, cheret nàrrere mòvere dae una sotziedade mirada susu s’acolomia de sa massajia e de su pastoriu a una sotziedade mirada a s’indùstria e a su consumu, cando at comintzadu a minimare s’imparu de su sardu dae mama a sos fizos. Faeddamus de su tempus istòricu de sos annos ’60 e ‘70 de su sèculu XX. In calidade de antropòlogu at iscritu in italianu duas òberas de importu de antropologia culturale e sotziolinguìstica: “Sardegna tra due lingue” (in su 1968) e “La rivolta dell’oggetto” (in su 1978). Mialinu Pira in calidade de iscritore at mandadu adenanti unu de sos primos romanzos in sardu logudoresu/nugoresu cun su titulu “Sos sinnos”.