Antonino Rubattu

(Rodi, 1938 – Sènnaru, 2019)

A

ntonino Rubattu est nàschidu in Lindos (ìsula de Rodi, in su mare Egeu) in su 1938 e est mortu in Sènnaru a edade de 81 annos in su 2019. Famadu meda in totu sa Sardìnnia laite fit poeta, tradusidore e lessicògrafu de balore in limba sarda. Fit laureadu in Lìteras e pro totu sa vida  at fatu chirca iscientìfica in su campu de sa Limba sarda. In Sènnaru, sa bidda sua, fit istadu sìndigu dae su 1975 fintzas a su 1983. Aiat fatu parte de sa prima cumissione de spertos de sa RAS pro su standard de sa limba sarda. Dirigidore de su zornale “S’Ischiglia” pro deghe annos. De Rubattu nos est pàrfidu justu  meda a l’amentare in custa setzione pro su tribàlliu mannu de lessicografia, e difatis est famadu meda pro su “ DULS” o  “ Ditzionàriu universali de sa Limba sarda” inue agatamus totu su sardu (in sas bariedades mannas logudoresa, nugoresa e campidanesa) e fintzas in àteras duas limbas de Sardìnnia (gadduresu e tataresu). Àtera òbera de importu mannu pro su chi pertocat sa lessicografia est: «Sa faeddada de Sènnaru» (chi est unu ditzionàriu de sa faeddada de sa bidda sua).