Enzo Espa

(Nùgoro, 1919 – Tàtari, 2014) 

E

nzu Espa est istadu unu iscridore, etnòlogu e professore. Fit nàschidu in Nùgoro in su 1919 e est mortu in Tàtari in su 2014. Aiat leadu sa làurea in Lìteras in s’Universidade “La Sapienza” de Roma; fit torradu in Sardìnnia in su 1954 fatende su professore in d-unu istitutu pro mastros de Tàtari, tzitade inue si fit frimadu. Fit istadu pro prus de degh’annos a cabu de sa Sotziedade Dante Alighieri. Triballiesit pro paritzu tempus comente currispondente pro su zornale “La Nuova Sardegna”. Fit unu grande istimadore de sa Limba sarda e difatis Espa est connòschidu pro s’òbera de lessicografia chi at iscritu. Famadu meda in totu sa Sardìnnia e non solu, est difatis connòschidu pro su “Dizionario Sardo-Italiano dei parlanti la lingua logudorese”. Custu ditzionàriu est de grande importu pro sa connoschèntzia de su sardu logudoresu.