Mario Puddu

(Illorai, 1944)

E

st nàschidu in Illorai tra Màrghine e Gotzeanu. Est laureadu in Pedagogia e at fatu daboi su professore in Santu Giuanne Suèrgiu. Sende professore de rolu s’est recusadu de jurare fidelidade a s’Itàlia. Issu puru patriotu sardu pro un’idea de liberassione de sa Sardìnnia. At iscritu unu romanzu in sardu logudoresu de importu mannu: Alivertu. In Alivertu s’autore at mustradu comente s’iscola italiana at iscantzelladu sa limba sarda e giughende fora s’identidade sarda. Custu puru est una forma de istranzamentu de sa pessone. Ma Màriu Puddu est famadu puru comente spertu de lèssicu sardu cun d-un’òbera manna meda e de importu mannu pro totu sa cultura sarda: su «Dils», est a nàrrere su «Ditzionàriu de sa limba e de sa Cultura sarda». Ditzionàriu inue totu sos lemas sun ispiegados in sardu. Cust’òbera est lòmpida a die de oe a sa de duas edissiones. Ma Màriu Puddu at fatu fintzas su mastru de ortogràfia e gramàtica sarda in su master de gradu I organizadu dae su Comune de Cuartu cun sa ghia iscientifica de s’Universidade de Casteddu in su 2005, pesende e imparende, pro sa prima borta, medas dipendentes pùbricos e mastros de sardu. Inoghe a sighire paritzas òberas suas: «Pro chi lìbbera torres e sias!», «Istòria de sa limba sarda»; «Gramàtica de sa limba sarda».