Antonio Pani

(Cuartu, 1962)

I

ncumentzat a 19 annus comenti cantadori campidanesu, s’atòbiat e cantat cun poetas de su tempus, comenti Giuanni Broi de Igrèsias, Rafaelli (Fieli) Urru de Brucei, Enea Danese de Pauli, Marcellu Matta de Domusnoas. De su 1998 a su 2002 est stètiu professori de is cursus de poesia campidanesa in su Comunu de Cuartu e at collaborau cun calincuna scola po fai connosci sa traditzioni de sa poesia cantada. Impari a Emanuele Saba e Paolo Zedda in su mesi-de-donniasantu de su 2003 at rapresentau s’Itàlia a s’atòbiu mundiali de poesia improvisada chi s’est fata me is Paisus Bascus. Cun is Argia (A.Balia, E.Frongia, M.Perra), at collaborau po su “Bàsciu e Contra” innui sa poesia improvisada s’amesturat a sa mùsica mediterrànea. Agoa fundat su grupu IDRAS. Impari a is musicistas Samueli Secci, Màssimu Serra e Franciscu Contu, fait su cd A sa luna, cun 9 cantzonis. Autori de “Su scrinniu de Campidanu” (1999), “Sulcis e Campidanu” (2000), “S’arrundili” (2001), “Cumbidu” (2003), “Bàsciu e contra” (2005), “Morigus” 2011, “A sa Luna” (2011) e “Baddai in sa festa” (2012). De su 2013 est presentendi me is pratzas de is biddas su spetàculu “Tradinnovazione”. Cun su grupu “NUR” svilupat su cantu in lìngua impari cun sa mùsica araba e sa cultura pop e sa mùsica eletrònica contemporànea fora de si scaresci de sa poesia improvisada. S’ùrtimu traballu discogràficu, “Rimas” dd’at prodùsiu sa Progeo Edizioni e in duus cantzonis ddoi est sa collaboratzioni de Davide Van de Sfroos.

ARROSA GALANA

Sa luxi in is ogus no ti mancat mai
Sa port’e su coru no póssidit crai
Ermosa coment’e una pranta froria ses tui,
Prenda de terra mia
Prenda de terra mia

Sa notti mi corcu sperendi ‘e bisai
Ti circu a de dì po ti solingai
Est bellu su soli chi luxit in susu, ma tui
Luxis finas de prus
Luxis finas de prus

Arrosa galana in giardinu froriu
Bellesa isulana, incantu nodiu
De cara gratziosa

Mi ‘olemu Leonardu po ti ritratai
O Danti poeta po t’agrandiai
M’arricit sa ‘oxi de unu cantori, ca tui

Ses reina de amori
Ses reina de amori
Arrosa galana in giardinu froriu
Bellesa isulana, incantu nodiu
De cara gratziosa (x3)

Gratziosa…

BABALLOTI

Baballoti, iscurtamì a mei,
bessiminci dei custa zona.
Mancai giris cun sa corona
no ses dignu de fai su rei.

Fattu prangi as a sa Cina
e tui fortzis t’ind’arriis,
ses piticu chi mancu ti bis
però dda scis fai sa faina.

Ma as a biri ca sa mexina
ti dda feus nosu sei sei.
Mancai giris cun sa corona
no ses dignu de fai su rei.

Cun sa màscara a tipu Zorru,
e mi tupu sa buca e su nasu,
a bessiri no est su casu
e in su divanu m’acorru.
Però candu a bessiri torru
mi dda fatzu una cursa a pei.
Mancai giris cun sa corona
no ses dignu de fai su rei.

Po isconfigi custu invasori
non gireis in cambarada,
abarrai a faci tupada
mancai siat cun su mucadori.