Su Sardu est espressau finsas de su Mesuevu in duas fueddadas mannas o macrobariedadis. Una de-i custas fueddadas mannas o macrobariedadis est su Sardu logudoresu/nugoresu (de imoi ainnantis arremonau che a Sardu logudoresu scéti) chi est fueddau in sa Sardìnnia de mesu (Barbàgia), in bona parti de su Cabu de Susu de s’Ìsula (Logudoro-Meilogu e Marghine-Gotzeanu) e in is ìsulas-linguìsticas de Luras e Terranoa. Su Sardu logudoresu est fueddau de unus 400milla personis e est sa prus bariedadi arcàica de sa lìngua sarda. Po contras perou est bastantementi diferenti de bidda in bidda. Aìnturu de su Sardu logudoresu podeus biri unas cantu suta-bariedadis: sa fueddada de sa truma barbaricina de Fonne-Ollolai; su Sardu logudoresu de bàsciu; su Sardu logudoresu de mesu; su Sardu logudoresu de susu e de scurigadòrgiu. Imprus sa prus parti manna de sa populatzioni de Luras e Terranoa (ìsulas linguìsticas sardofonas in Gaddura) fueddat oindii puru su Sardu logudoresu.
