Mario Puddu

(Illorai, 1944)

E

st nàscïu in Illorai a tretuemesu de Màrghine e Gotzeanu. Est laureau in Pedagogia e apustis at fatu su professori in Santu Giuanni Suèrgiu. Sendi professori de rolu s’est arrefudau de giurai fidelidadi a s’Itàlia. Issu puru est unu patriotu sardu po un’idea de liberatzioni de sa Sardìnnia. At scritu unu romanzu in sardu logudoresu de importu mannu: Alivertu. In Alivertu s’autori at amostau comenti sa scola italiana at burrau sa lìngua sarda e aguantau aforas s’identidadi sarda. Alivertu arrapresentat is sardus, dònnia sardu, su sardu chi in sa Scola italiana at pèrdiu s’identidadi sua. Custa puru est una forma de alienatzioni de sa personi. 

Ma Màriu Puddu est famau puru comenti spertu de lèssicu sardu cun d-un’òbera manna meda e de importu mannu po totu sa cultura sarda: su «Dils» est a nai su «Ditzionàriu de sa limba e de sa Cultura sarda». Ditzionàriu aundi totu is lemas funt spricaus in sardu. Cust’òbera est lòmpia ondii a sa segundu editzioni. Ma Màriu Puddu at finsas fatu su maistu de ortografia e gramàtica sarda in is maistaxus de gradu I organisaus de su Comunu de Cuartu cun sa ghia scientìfica de s’Universidadi de Casteddu in Cuartu in su 2005 pesendi e adelantendi, po sa primu borta, medas dipendentis pùbricus e maistus de sardu. Labai a unus cantu òberas suas: «Pro chi lìbbera torres e sias!»; «Istoria de sa limba sarda»; «Gramàtica de sa Limba sarda».