Comunicau nr 02/2024
Cun custu comunicau s’assòtziu culturali «Acadèmia de su Sardu APS», de annus impinniau in sa defensa, avaloramentu e afortiamentu de s’imperu de sa lìngua sarda fueddada e scrita, INTERBENIT asuba de sa chistioni de comenti lompi a lestru a unu bilinguismu cumpriu e a s’introdusidura de sa co-ofitzialidadi de su sardu.
«Acadèmia de su Sardu APS» est de su parri chi su Statu italianu e sa Regioni Autonoma de Sardìnnia tengant su dèpidu de fai a manera de ponni in efetu sa Carta italiana e su statudu de autonomia spetziali de Sardìnnia po chi si potzat lompi a lestru a unu bilinguismu cumpriu, po chi su sardu potzat tenni sa metassi dinnidadi e ofitzialidadi de sa lìngua italiana in sa sotziedadi, aici comenti in is istitutzionis, in s’aministratzioni pùbrica e finsas in sa toponomàstica.
«Acadèmia de su Sardu APS» cun arreferimentu a sa lìngua sarda e duncas a totu sa comunidadi sardofona de Sardìnnia, chi tenit assumancu 1 millioni e 250milla personis, est de su parri chi su livellu de amparu e afortiamentu de custa lìngua depat essi artziau luegus a su matessi livellu de is àteras minorias regionalis che a esempru cuddas germanòfonas, francòfonas e slavas chi ddoi funt storicamenti aìnturu de is làcanas de sa Repùbrica matessi. Sperues duncas chi si potzat lompi a aplicai a manera cumpria s’art. nr 6 de sa Carta italiana. In d-una repùbrica chi narat de essi democràtica no nci podint essi discriminatzionis, no nci podint essi minorias de livellu A e minorias de livellu B, is deretus funt agualis po totus.
Est po custa arraxoni chi pedeus a boxi manna a is consilleris regionalis de calisisat partidu, movimentu e ideologia de fai a manera de introdusi LUEGUS sa co-ofitzialidadi de sa lìngua sarda in su statudu de autonomia po chi sa sotziedadi sarda bessat bìlingua diaderus e po chi su sardu potzat essi introdùsiu a pretzisu che a matèria de imparu curriculari in dònnia scola de dònnia òrdini e livellu de s’ìsula e in s’universidadi; sa pròpiu cosa po su chi pertocat s’aministatzioni pùbrica e is istitutzionis sardas. No fait prus a andai ainnantis a progetus e progeteddus. Seus timendi chi sa lìngua sarda si sperdat in d-unus cantu annus in su benidori e po custa arraxoni no podeus e no boleus prus abetai. Sa sotziedadi sarda dd’at arròscïa custa mancàntzia de arrespetu po is deretus de is sardofonus.
Po acabbai duncas, in custu comunicau pedeus a totu is consilleris regionalis sardus, de calisisiat partidu e ideologia polìtica, de lompi a un’arresurtau stòricu mannu aìnturu de custa leisladura matessi, ponendi acabbu po sèmpiri a unu stentu chi no fait prus a apoderai.
PAULI (CA), 14.12.2024
S’assòtziu culturali
Acadèmia de su Sardu APS
