Comunicau nr 01/2024
Cun custu comunicau s’assòtziu culturali «Acadèmia de su Sardu APS», de annus impinniau in sa defensa, avaloramentu e afortiamentu de s’imperu de sa lìngua sarda fueddada e scrita, INTERBENIT asuba de sa chistioni bècia de sa ratìfica de sa Carta europea de is lìnguas regionalis e minorisadas (1992).
«Acadèmia de su Sardu APS» est de su parri chi su stentu mannu assumau de s’Italia po su chi pertocat sa ratìfica de sa Carta no potzat essi prus apoderau. Aguantau in cunsideru chi sa majoria de is lìnguas regionalis chi ddoi funt aìnturu de is làcanas de sa Repùbrica megant de sparessi innantis de s’acabbu de su de 21 sèculus, iat a essi de profetu chi su Stadu ponessit arremèdiu a-i custu stentu, ca sinunca s’iat a sperdi totu custa prenda culturali e stòrica de sa Repùbrica.
«Acadèmia de su Sardu APS» cun arreferimentu a sa lìngua sarda e duncas a totu sa comunidadi sardofona de Sardìnnia, chi tenit assumancu 1 millioni e 250milla personis, est de su parri chi su livellu de amparu e afortiamentu de custa lìngua depat essi artziau luegus a su matessi livellu de is àteras minorias regionalis che a esempru cuddas germanòfonas, francòfonas e slavas chi ddoi funt storicamenti aìnturu de is làcanas de sa Repùbrica matessi. Spereus duncas chi si potzat lompi a aplicai a manera cumpria s’art. nr 6 de sa Carta italiana. In d-una repùbrica chi narat de essi democràtica no nci podint essi discriminatzionis, no nci podint essi minorias de livellu A e minorias de livellu B, is deretus funt agualis po totus.
Po acabbai duncas in custu comunicau pedeus a totu is parlamentaris sardus, de calisisiat partidu e ideologia polìtica, de lompi a un’arresurtau stòricu aìnturu de custa leisladura, ponendi acabbu po sèmpiri a unu stentu chi no fait prus a apoderai. Spereus in prus chi sa Regioni Autònoma de Sardìnnia si pongat a fai intendi sa boxi sua a manera de apretai su parlamentu a fai luegus sa ratìfica de sa Carta europea e pedeus a boxi manna a su Presidenti de sa Repùbrica Sergio Mattarella de defensai is deretus linguìsticus de is sardus amparaus giai de sa Carta matessi.
PAULI (CA), 06.11.2024
S’assòtziu culturali
Acadèmia de su Sardu APS
