S’Acadèmia contras a su nucleari

S’ACADÈMIA DE SU SARDU ONLUS, CUN SU DOCUMENTU PRESENTI INTRAT IN SU COMITAU.SI.NONUCLE.

DIFATIS S’ACADÈMIA DE SU SARDU ONLUS EST CONTRAS DE SU NUCLEARI, IN SARDÌNNIA E IN SU MUNDU.

SA CULTURA E SA LÌNGUA NOSTA FUNT FILLAS DE UNU MUNDU LÌMPIU E SINTZILLU, DE UN’ECONOMIA, FATA PRUSCHETOTU DE MESSAJUS E PASTORIS CHI ANT CUNCORDAU UNA LÌNGUA CHI DE CUSSA ECONOMIA EST S’ESPRESSADA.

DUNCAS S’ACADÈMIA DE SU SARDU ONLUS, CHI EST S’ASSÒTZIU CHI DEFENDIT E SPRUNDIT SA LÌNGUA NOSTA, EST AMAROLLA CONTRAS DE DÒNNIA PROGETU, COMENTI SU NUCLEARI, CHI PORTAT IDEA DE NDI SDERRUI SU MUNDU, DE NDI IMBRUTAI SU LOGU NOSTU, DE NDI STRUPIAI S’ECONOMIA, DE IMPOBERAI SA GENTI, DE SARDÌNNIA E DE SU MUNDU.

S’ACADÈMIA DE SU SARDU ONLUS EST DE SU PARRER CHI S’ISVILUPU DE SA SARDÌNNIA PRO SU TEMPUS BENIDORE SIAT FUNDADU IN SAS RICHESAS DE S’AMBIENTE, DE SA TERRA, DE SU MARE E DE SA SIGURESA E LIMPIESA DE S’AERA E DE SU CHELU NOSTRU.

NOIS SEMUS RESPETOSOS DE TOTUS SOS PÒPULOS DE SU MUNDU CHI GHERRAN PRO UNU CRAS DE PAGHE E DE BENÈSSERE E DUNCAS SEMUS SERENTE A CHIE PRO CUSTOS IDEALES EST PELEANDE E GHERRANDE CADA DIE E DUNCAS CHERIMUS CHI IN CADA PARTE DE SARDÌNNIA, IN CADA BIDDA, MANNA O MINORE, SI DEFENDAT SA SALUDE E SA SIGURESA DE SOS TZITADINOS, SI DEFENDAN SAS BONESAS DE S’AMBIENTE CHI SOS BABOS E MANNOIS NOSTROS NOS AN LASSADU E CHI GRàSSIAS A ISSOS OE EST UNA PRENDA DE ORO S’AMBIENTE DE SA SARDIGNA.

E NON CHERIMUS CHI CUSTOS PROGETOS NUCLEARES POTAN PONNER IN PERÌGULU SA VIDA DE SOS SARDOS PRIMA DE TOTUS, MA PURU SA SIGURESA DE SOS ATEROS PÒPULOS DE SU MEDITERRÀNEU.

SA SARDÌNNIA IN CUSTOS ANNOS SI-CH’EST ILLIBERANDE E ILLEBIANDE DAE SU COLONIALISMU DE SAS BASES MILITARES E DEPIMUS TOTUS PARIS PARARE FRONTE CONTR’A A SU PERÌGULU NOU DE UN’ÀTERU COLONIALISMU, SU DE SU NUCLEARE.

COMENTE AMUS E SEMUS GHERRANDE PRO MANTENNER SÌNCHERA E LÌBERA SA LIMBA NOSTRA E SA LIMBA DE SAS BIDDAS NOSTRAS, CA CADA BIDDA CHERET DEFESA, PRO LA SARVARE DAE SOS CORBOS CHI SI-CHE-LA CHEREN INGURTIRE, GAI AMUS A GHERRARE PRO DEFENDER SA SARDÌNNIA DAE SU NUCLEARE E DAE SOS GUTURZOS CHI SI-CHE CHEREN INGURTIRE SA TERRA NOSTRA PARIS CUN SOS ABITANTES.

A TERRA SU NUCLEARE! A FORAS SOS COLONIALISTAS CHI NOS CHEREN PONNER SUTA PEDES CUN SAS ARMAS DE SA MODERNIDADE FRASSA E IMBOLIGOSA DE SAS CHÌMICAS E ÀTOMOS PRO CRIARE ISTRUMENTOS DE MORTE E DE PERÌGULU!

CHERIMUS BARDARE SA TERRA NOSTRA DAE CUSTAS DISGRÀSSIAS CHI NOS CHEREN IMBATILARE CHENE INTENDER SU PARRER DE SOS SARDOS!

S’ACADÈMIA DE SU SARDU ONLUS EST DE SU PARRIMENTU CA DÒNNIA DOCUMENTU DEPIT ESSI SCRITU IN SARDU E PO SARDU BOLIT NAI CA IS PRUS BARIEDADIS FUEDDADAS DE SARDÌNNIA, SU CAMPIDANESU E SU LOGUDORESU, POTZANT ESSI PRESENTIS IN IS DOCUMENTUS IMPITZUS ARREMONAUS, AICI COMENTI EUS FATU IN CUSTA LÌTERA, CA PO MORI DE DEMOCRATZIA EUS CUNCORDAU E LÌGIU PARTI IN CAMPIDANESU E PARTI IN LOGUDORESU

PO S’ACADÈMIA DE SU SARDU ONLUS

SU PRESIDENTI ORESTI PILI

SU VISUPRESIDENTI TONINO BUSSU

CASTEDDU, SU 24 DE SU MESI DE ARGIOLAS 2010

Delìbera

Manifestu

Logo