Salvatore Meloni (Doddore)

S

arbadore Meloni (Ìtiri Cannedu 04.05.1943 – presoni de Uda 05.07.2017) connotu puru cun su nòmini de Doddore fiat unu patriotu sardu indipendentista chi in is batallas suas at circau sèmpiri de defensai sa lìngua sarda e is deretus linguìsticus de is sardus. Fiat un’impresàriu e autotrasportadori. In polìtica fiat famau meda ca, impari a Bainzu Piliu e a Oresti Pili, fiat unu de is polìticus de prus importu in su Partidu Sardu de is annus setanta de su sèculu passau. Difatis impari a Piliu e a Pili faiat parti de sa currenti indipendentista de su Partidu Sardu. In su 1981 est unu de is promovidoris, impari a Oresti Pili, de sa motzioni chi, su 6 de su mesi-de-idas de su 1981 in su Cungressu n° XX in Portu Turre, delìberat sa mudadura de s’art. 1 de su statudu de su Partidu Sardu, faendi-ddu bessiri indipendentista
De su 1981 a su 1982 ddu impresonant e su Stadu italianu ddu acusat de essi unu “cungiuradori” impari a Bainzu Piliu e a Oresti Pili. A Doddore ddu cundennant a noi annus de presoni “po essi andau contras a s’unidadi de su stadu”. Craramenti in custa arrassinna lestra no podeus arresuminai totu su protzessu, ma podeus afirmai cun craresa ca is chistionis giuditziàrias de Doddore ant donau un’agiudu mannu a s’arreconnoscimentu ofitziali de su sardu comenti lìngua e a sa defensa de is deretus linguìsticus de is sardus. In su 2008 torrat a fai polìtica a manera ofitziali cun su movimentu polìticu Meris (Movimentu europeu rinàschida sarda). In su 2014 at pediu e otènniu, in d-unu protzessu, de podi tenni sa tradutzioni de is àutus de su Tribunali in sardu campidanesu puru, faendi a manera de fai aplicai sa Lei de su Stadu nr 482/1999.

Acusau de frode fiscale ddu impresonant in su 2017 e luegus Doddore decrarat de essi unu presoneri polìticu. Po amostai de essi notzenti cumentzat unu sciòperu de su fàmini e de su sidi. Est mortu su 5 de su mesi-de-argiolas de su 2017 apustis de 66 diis de sciòperu de su fàmini e de su sidi. Po s’interru suu su predi de sa Seu de Terraba-Ales at fatu sa missa in sardu cunforma a unu disìgiu de Doddore Meloni.