Angius’ House Luigi Bullitta

(Casteddu, 1988)

A

ngius’ house nascit che a unu giogu in su mesi-de-ladàmini de su 2019 cun d-unu vìdeu cun d-unus cantu personàgius chena de nòminis. In pagu tempus Luisu Bullitta, s’imbentori de custus personàgius, at tentu aprètzius medas e at pensau de ndi stantargiai una pàgini in Instagram.
In custa manera nascit sa famìllia Angius, cun ajaja Gisella, sa filla Marisa, cojada cun Bissenti e is fillus insoru Michael e Veronica. In sa vida de sa famìllia est sèmpiri presenti Patty puru, bixina de domu e amiga corali de Marisa.
Sa stòria si spòddiat totu in sa bidda de Uda e giai sèmpiri fueddendi in Sardu campidanesu.
Abellu abellu sa famìllia s’est amanniada aciungendi amigus, connoscentis, bixinus de domu e àterus personàgius chi scrucullant, insullant e movint sa stòria: po ndi nai una, Vitàlia, connada de Gisella, trassera, figurat s’afrenta. Un’àteru personàgiu chi cumparrit a fitianu impari cun issa est Immacolata Toeschi, cun sa fràsia sua famada “Che eri facendo, ciccia?”; una fèmina aresti, de carena grussa e una boxi chi fait torrai a pùlixi sa genti chi fueddat cun issa.
Circhendi de fai arriri, Angius’ house circat de pigai chistionis de dònnia dii a comenti su bullismu, matracas sentimentalis, disamparus, barrancus de piciocus e àteras chistionis chi pertocant sa sotziedadi.
Totu is vìdeus funt fatus imperendi s’app Snapchat, chi permitit a Luisu de si stramudai in totu is personàgius donendi a cadaunu unu forti naturali e finsas una cara sua scheta.
Su grofali de sa “sit-com” est sa lìngua sarda, chi Luisu at imparau gràtzias a ajaja sua. In su benidori, Luisu at a sighiri a contai is stòrias de sa famìllia Angius, sperendi unu cras de podi imprentai unu lìburu.