Gianluca Medas

(Casteddu, 1962)

S

cridori, autori, regista, atori, contadori, est s’erederu de s’ùnica famìllia sarda de artis, is fradis Medas. Est un’artista abistu, cantadori de sa terra sua stimada.
At fatu programas medas po sa televisioni, pruschetotu po Videolina, Sardegna Uno e RAI Sardegna: “Sentidu”, “Su tempu Benidori” e “Filindeu” chi praxint meda a su pùbricu. At fatu puru “La Grande Madre”, “Talentu”, “Umbras”, i “Mostri in Mostra”, “Itinerando”, “Cara Sardegna”, “Il TG dei ragazzi” (prèmiu Ilaria Alpi), “Argo”, “Bator Moros” e “Sa vida”.
Comenti atori de films at pigau parti a fainas de registas sardus e italianus: “Caccia Grossa” de Palma, “Nois totus” de D’Onofrio, “Disamistade” de Gianfranco Cabiddu (candidau a su David de Donatello), “Il Figlio di Bakunin” ancora de Cabiddu (in cuncursu a sa Mostra del cinema di Venezia), “Atto di Dolore” de Jo Bastardi, “Per Sofia” de Ilaria Paganelli, “Risvegli” de Maurizio Usai, “L’Alias” de Roberto Priamo Sechi, e su teleromanzu de RAI Uno “Frontiere” de Bernini cun Fabrizio Gifuni, “Lo stato delle Anime” de Peter Marcias e “Il Cinema” de Romano Usai.
Comenti regista at fatu su documentàriu “Il Rumore del buio”, is curtzus-metràgius animaus “L’ultimo Mamuthone” (chi at tentu medas apretziamentus) e “Lianora”, arribbau in finali a su Giffoni film festival (2020).
Gianluca Medas est traballendi apitzus de su curtzu-metràgiu nou “Angeli” e a su documentàriu “Viajantes” e est finsas cuncordendi su primu longu-metràgiu po sa televisioni, “Emilio Lussu”, cun s’atori Enrico Lo Verso.
Est dirigidori artìsticu de su Teatro Fratelli Medas, de Guasilla, de su Teatro Moderno de Pauli e de medas spetàculus e festival peri totu sa Sardìnnia.
At cuncordau spetàculus teatralis in Italianu e in Sardu a comenti: “Fisici storie sulla bomba atomica”, “Processo ad Emilio Lussu”, “Angeli”, “Godot 2.0”, “Canale 16” (dedicau a sa disgràtzia de su piròscafu Moby Prince), “Il Caso Manuella” (dedicau a sa sparèssida de s’abogau casteddaju), “La Storia di Simon Mossa” e àterus. In Sardu at fatu is spetàculus pigaus de is lìburus de Giuseppe Dessì, cun s’agiudu de sa Fondazione Dessì de Biddaxidru: “Il disertore”, “Paese d’ombre”, “I Passeri”, “Eleonora d’Arborea”, “Michele Boschino”, “San Silvano”, “Eleonora d’Arborea”.
In su 2019 cun su spetàculu “Gurdones-Mammai Manna” at primitziau sa tournée in Tunisia po dda sighiri in Rùssia, Libano, Singapore e Malèsia.
At finsas fatu cuàturu contus dedicaus a sa nàscida de is partidus modernus.
At scritu unus cantu romanzus: “Sardegna dei Sortilegi” (Newton Compton), “Le Frazioni del Moro” (Condaghes), “Le avventure di Flamingo” (Condaghes), e “Cammina Cammina” imprentau de sa RAS, “Schillellè” e “Mammai Manna” (Cuec) e “Paschedda Zau” prontu a essi pubricau.