Elena Ledda

(Ceraxius, 1959)

C

umentzat a giòvuna cun sa mùsica de su connotu acostendi-ddi, a 16 annus, su stùdiu de cantu clàssicu a su Conservatòriu Pierluigi da Palestrina de Casteddu.
In is annus ’70, annus de grandu impèllida culturali, Aleni interpretat Brecht, Weill e Eisler, cantat cantu clàssicu, fait is primus fainas filològicas de mùsica antiga (de su mesuevu a su barocu) e pigat parti a is primus esperimentus de mùsica de oindii. In su matessi tempus sighit a studiai sa mùsica sarda de su connotu, mùsica chi, a s’acabbu at a caraterisai s’arti de Aleni in is annus afatantis.
In custus annus atopat su sonadori e componidori sardu Mauro Palmas, chi at a bessiri cumpàngiu de sceberus e de progetus po giai totu sa carriera artìstica.
Aleni, sopranu dramàticu cun d-una boxi spantosa, est una de is prus boxis de importu de su connotu sardu e mesuderraneu. In prus de trint’annus de mùsica at portau sa mùsica sarda e su nuscu de su Mesuderraneu in dònnia furrungoni de su mundu, de is biddixeddas prus piticas finsas a New York, Sidney, Rio de Janeiro e àteras grandus tzidadis. At cantau cun is prus mannus artistas natzionalis e internatzionalis.

Cun “Rosa resolza” in su 2007 bincit sa targa a su Prèmiu Tenco po sa mùsica popolari e su Prèmiu Tzitadi de Loano po sa mùsica de su connotu italiana.
Cun sa faina discogràfica “Cantendi a Deus – Elena Ledda” arribat in finali a su Prèmiu Tenco 2010 e a su Prèmiu Tzitadi de Loano 2010. Si merescit finsas su Prèmiu P.I.M.P.I. (Premio Italiano Musica Popolare Indipendente) po sa mellus faina traditzionali.

In su 2017 “Làntias” bincit su Prèmiu Mario Cervo e su Prèmiu Tzitadi de Loano po su mellus discu de mùsica traditzionali de s’annu. Andat puru in finali a su Prèmiu Tenco.
Sighit a binci prèmius e a si meresci arreconnoscimentus po sa mùsica e po is fainas suas.
Aleni Ledda at arregistrau 19 discus e at pigau parti a àterus 22 fainas a comenti cantanti e autora. De su 2001 est diretora artìstica de s’Assòtziu culturali Elenaledda Vox chi apariciat atòbius e cursus de cultura musicali e s’incurat de finantziai e pubricai is fainas de giòvunus cantantis in Sardìnnia, Itàlia, Frantza, Svìtzera e Germània.

De su 2011 est diretora artìstica de su Prèmiu Andrea Parodi.
De su 2014 est professora de Cantu popolari e incuradora de is Seminàrius de Cantu, Mùsica e Baddu Popolari apariciaus po “Mare e Miniere” a Gonnesa, Portescusi, Bidd’ ‘e Cresia, Sant’Antiogu e Biddaxidru cun scientis de mesu Europa.