Menhir

(Nùgoro, 1997)

I

s Menhir, nugoresus, funt nàscïus in su ’97 e ndi faint parti Kingaiè e Momak, artistas cun sperièntzias de importu in su hip-hop e breakdance, issus puru cantant in sardu. A càbudu de is annus ’90 andant a Torinu po traballai impari cun artistas connotus in sa scena hip hop italiana. In su 2002, gràtzias a su traballu cun Dj Gruff, ndi stantàrgiant su progetu “Pecorino sardo”, arribbendi a essi connotus meda finsas in terramanna. Sèmpiri in su 2002 torrant in Sardìnnia e bincint sa de 5 editzionis de su festival de sa cantzoni sarda bessendi-ndi aici una “pedra de contonada” de su rap sardu. In su 2007 faint unu cd intitulau Menhir, innui sonant cun d-una pariga de is mellus artistas sardus: su tenori Angelo Caria, su jazzista Gavino Murgia, Simone Pala e Federica Gallus. Is cantzonis fueddant de chistionis pruschetotu sotzialis, imperendi curbas chi is arrapadoris sterrint lompendi a acrobatzias lìricas schetas in d-un’arrìtimu e una mùsica chi andat de su rap a su funk, black music cundida e amesturada cun sa mùsica de su connotu sardu. Su discu Abissi est de su 2015. In is cuntzertus ddus acumpàngiat Dj Lork e fatuvatu musicistas de sa black music.